نگراں حکومت نے خاتمے سے چند روز قبل اسٹبلشمنٹ ڈویژن کے اعلی افسران کے تبادلے کر دیئے ۔

اسلام آباد(الرٹ نیوز)اسٹبلشمنٹ ڈویژن اسلام آباد کے اعلی افسران میں اکھاڑ پچھاڑ شروع کر دی گئی ۔متعدد افسران کو اعلی عہدوں سے ہٹا کر او ایس ڈی بنا دیا گیا جبکہ بعض افسران کو دوسرے محکموں میں بھیج دیا گیا ہے ۔الرٹ نیوز کو موصول ہونے والے نوٹی فکیشن کے مطابق اسٹبلشمنٹ ڈویژن میں گریڈ 18 کی ڈپٹی سیکرٹری لبنی سید کو عہدے سے ہٹا کر او ایس ڈی بنایا گیا ہے ۔گریڈ 21 کے افسر ڈاکٹر ارشد محمود کو فنانس ڈویژن میں ایڈیشنل سیکرٹری تعینات کیا گیا ہے ۔سیکرٹری اسٹبلشمنٹ ڈویژن گریڈ 22 کے افسر اورنگزیب حق کو ڈائریکٹر جنرل سول سروس اکیڈمی لاہور کا بھی 3 ماہ کیلئے چارج دیا گیا ہے ۔معلوم رہے یہ ٹرانسفر پوسٹنگ نگراں دور حکومت میں اس وقت کی جارہی ہیں جب منتخب ممبران اسمبلی اپنا حلف لیکر اسمبلی میں جانے والے ہیں اور نگراں حکومت ختم ہونے والی ہے جس کے باوجود اعلی عہدوں کے افسران کے تبادلے اور انہیں چارج دیئے جارہے ہیں ۔