ایف بی آر کا پراپرٹی کے نئے ریٹس جاری کرنے کا فیصلہ، 12 مزید شہروں میں بھی ویلیوایشن مقرر ہوگی
اسلام آباد: فیڈرل بورڈ آف ریونیو (ایف بی آر) نے ملک بھر میں جائیدادوں کی قیمتوں کے نئے تعین اور پراپرٹی کے ریٹس جاری کرنے کا فیصلہ کیا ہے۔ ذرائع کے مطابق پراپرٹی کے نئے ریٹس آئندہ چند روز میں جاری کیے جانے کا امکان ہے۔ اس فیصلے کے تحت مزید 12 شہروں میں بھی ایف بی آر ریٹ مقرر کیے جائیں گے۔
ایف بی آر کے ذرائع کا کہنا ہے کہ مختلف شہروں میں جائیدادوں کی قیمتوں کے ازسر نو تعین کا عمل مکمل کر لیا گیا ہے، اور پراپرٹی کی نئی ویلیوایشن کو مارکیٹ ریٹس کے زیادہ قریب لانے کی کوشش کی گئی ہے تاکہ جائیداد کی درست قیمت کا تعین کیا جا سکے۔ اس عمل کا مقصد جائیدادوں پر ٹیکس وصولی میں اضافہ کرنا ہے۔
ذرائع کے مطابق بلوچستان کے شہروں میں جائیداد کی قیمتیں کچھ کم کی جائیں گی جبکہ کراچی، لاہور، اسلام آباد، پشاور اور دیگر بڑے شہروں میں جائیداد کے نئے ریٹس کا تعین کیا جائے گا۔
ذرائع کا کہنا ہے کہ یہ نیا ویلیوایشن ٹیبل وزارت قانون کی توثیق کے بعد جاری کیا جائے گا۔ ممکنہ طور پر رواں ہفتے ہی پراپرٹی کے نئے ریٹس جاری ہو جائیں گے۔ ایف بی آر کے مطابق ریئل اسٹیٹ اور تعمیرات کے شعبوں کی حوصلہ شکنی نہیں کی جائے گی، اور پراپرٹی کے فائلوں کی خرید و فروخت کرنے والوں پر ٹیکس میں اضافے کی تجویز زیر غور ہے۔
پراپرٹی کے نئے ریٹس کے تعین میں ریئل اسٹیٹ ایسوسی ایشنز، بلڈرز اور ڈویلپرز کے ساتھ مشاورت کی گئی ہے تاکہ جائیداد کے شعبے سے متعلق تمام فریقوں کی رائے شامل کی جا سکے۔ اس نئے ویلیوایشن کے تحت بھکر، چارسدہ، چنیوٹ، خانیوال، خوشاب، میانوالی، سبی، اور صوابی جیسے شہروں میں بھی پراپرٹی کے ریٹس مقرر کیے جائیں گے۔
ایف بی آر کے اس اقدام سے جائیدادوں کی قیمتوں کا تعین زیادہ منصفانہ اور شفاف ہونے کی امید کی جا رہی ہے، جس سے جائیداد کی خرید و فروخت میں آسانی پیدا ہوگی اور ٹیکس وصولیوں میں اضافہ متوقع ہے۔