کالج ایجوکیشن ڈپارٹمنٹ سندھ کی ہدایات پر ایک مضمون نویسی مقابلے کا انعقاد گورنمنٹ ڈگری بوائز کالج سیکٹر 42، کورنگی ڈھائی نمبر میں کیریکٹر بلڈنگ سوسائٹی کے زیر اہتمام ہوا۔ اس مقابلے کا مقصد طلبہ میں دیانت داری، احتساب اور شفافیت کی اہمیت کو اجاگر کرنا تھا۔ اس اقدام کو نیب (نیب ایکشن پلان) کے تعاون سے عملی جامہ پہنایا گیا، جو کرپشن سے پاک معاشرے کے فروغ اور طلبہ میں اخلاقی اقدار کو تقویت دینے کے لیے کوشش کر رہا ہے۔
پروگرام کے دوران طلبہ نے دیانت داری، انصاف اور شفافیت کے اصولوں پر مضامین لکھے اور اپنی تحریری صلاحیتوں کا بھرپور مظاہرہ کیا۔ اس تقریب میں نمایاں کارکردگی دکھانے والے طلبہ کو انعامات سے نوازا گیا اور ان کی کاوشوں کو سراہا گیا۔
اس کامیاب پروگرام کے انعقاد میں کالج کے پرنسپل، پروفیسر جاوید اختر شیخ نے مرکزی کردار ادا کیا۔ ان کی رہنمائی اور قیمتی معاونت کے باعث یہ مقابلہ کامیابی سے ہمکنار ہوا۔