کراچی: اسلامی جمعیت طلبہ کے زیرِ اہتمام "Teknofest Pakistan” کا شاندار آغاز، طلبہ و طالبات کا جمِ غفیر
کراچی (پریس ریلیز): کراچی میں ٹیکنالوجی کی سب سے بڑی نمائش "Teknofest Pakistan” کا آغاز آج ایکسپو سینٹر میں ہوا۔ اس شاندار ایونٹ کا افتتاح اسلامی جمعیت طلبہ کراچی کے ناظم اور ٹیکنوفیسٹ کے سربراہ حافظ محمد آبش صدیقی نے کیا۔ نمائش میں کراچی چیمبر آف کامرس کے چیئرمین جاوید بلوانی، سید یونیورسٹی کے وائس چانسلر ڈاکٹر منور حسن، وائس چانسلر ڈی-ایچ-اے صفاء یونیورسٹی بریگیڈیئر (ر) احمد حسن، اور سلیم حبیب یونیورسٹی کے وائس چانسلر عرفان حیدر سمیت دیگر اہم شخصیات نے شرکت کی۔
افتتاحی تقریب میں حافظ محمد آبش صدیقی نے اپنے خطاب میں کہا کہ "Teknofest پاکستان، طالب علموں اور انڈسٹری کے درمیان ایک پُل کا کام کرے گا، اور یہ طالب علموں کے لئے ٹیکنالوجی میں روشن مستقبل کا ایک اہم سنگ میل ثابت ہوگا۔” انہوں نے شرکاء اور مہمانوں کا شکریہ ادا کرتے ہوئے اس ایونٹ کے ذریعے پاکستان کے نوجوانوں کی تخلیقی صلاحیتوں کے بھرپور استعمال کی امید ظاہر کی۔
مہمانوں کے خیالات اور نمائش کے اہم پہلو
کراچی چیمبر آف کامرس کے چیئرمین جاوید بلوانی نے اسلامی جمعیت طلبہ کو کامیاب ایونٹ منعقد کرنے پر مبارکباد دیتے ہوئے کہا کہ "یہ ایونٹ پاکستان میں ٹیکنالوجی اور انڈسٹری کے درمیان پل کا کردار ادا کرے گا اور طالب علموں کے لئے ایک روشن مستقبل کی نوید ثابت ہوگا۔”
اس موقع پر بتایا گیا کہ ٹیکنوفیسٹ میں 200 سے زائد اسٹالز لگائے گئے ہیں جن میں انفارمیشن ٹیکنالوجی، آرٹیفیشل انٹیلیجنس، جاب فیئر، اور مختلف صنعتی شعبہ جات شامل ہیں۔ مزید برآں، 30 سے زائد ملٹی نیشنل کمپنیاں اس دوران انٹرویوز کر رہی ہیں اور طلبہ کو روزگار کے مواقع فراہم کر رہی ہیں۔
مقابلے اور انعامات
فیسٹیول کے دوران 50 سے زائد مقابلے منعقد کیے جا رہے ہیں جن میں سائبر سیکورٹی، روبو وارز، اور دیگر جدید ٹیکنالوجیز کے شعبے شامل ہیں۔ ان مقابلوں میں کامیاب طلبہ کے لئے ایک کروڑ روپے کے انعامات تقسیم کیے جائیں گے۔
اس کے علاوہ، طلبہ نے اپنے بنائے ہوئے پروجیکٹس کے 100 سے زائد اسٹالز بھی لگائے ہیں۔ سب سے بہترین پروجیکٹ کو "Innovation of the Year” کا نقد انعام، 10 لاکھ روپے دیا جائے گا۔
تقریر اور ماہرین کی رائے
سوشل میڈیا انفلوئنسر اور سی ای او سیون سلوشنز عرفان ملک نے خطاب کرتے ہوئے کہا کہ آرٹیفیشل انٹیلیجنس جو ابھی موجود ہے وہ برف کے اوپر کا حصہ ہے جبکہ پورا پہاڑ ابھی سمندر کے اندر ہے۔ انہوں نے ٹیکنالوجی کی اہمیت پر زور دیتے ہوئے کہا کہ حکومت ٹیکنالوجی کی ترقی کو نہیں روک سکتی، تاہم ہمیں اس کا درست استعمال سیکھنا چاہئے۔
عمار جعفری، سابق ڈائریکٹر ایف آئی اے اور سائبر سیکیورٹی ماہر نے کہا کہ حکومت پر بھروسہ کرنا مشکل ہے، مگر ٹیکنالوجی میں ترقی کا راستہ خود بنانا ہوگا۔ انہوں نے مزید کہا کہ آرٹیفیشل انٹیلیجنس لوگوں کی نوکریوں پر اثر ڈال سکتی ہے، اور جامعات میں پڑھایا تو جاتا ہے مگر عملی تعلیم کم دی جاتی ہے۔
فیسٹیول کا مقصد
Teknofest پاکستان کا مقصد طلبہ کو مایوسی سے نکال کر انڈسٹری سے منسلک کرنا اور ملک میں امید کی کرن کو فروغ دینا ہے۔ یہ ایونٹ دو روز تک جاری رہے گا اور نمائش کے دروازے صبح 10 بجے سے رات 9 بجے تک کھلے رہیں گے۔