غزہ میں صہیونی افواج کے حملے میں صحافی بلال رجب شہید

غزہ سٹی میں صہیونی افواج کے ایک حملے میں معروف فلسطینی صحافی بلال رجب شہید ہو گئے۔ حملہ الفرس مارکیٹ کے قریب ایک شہریوں کے گروپ کو نشانہ بنانے کے دوران ہوا، جس میں بلال رجب بھی اپنی پیشہ ورانہ ذمہ داریاں انجام دیتے ہوئے جان کی بازی ہار گئے۔

بلال رجب 7 اکتوبر 2023 سے جاری صہیونی حملوں میں شہید ہونے والے 183ویں صحافی ہیں، جو فلسطینی صحافی برادری میں غم اور غصے کی لہر کا باعث بن رہا ہے۔ حالیہ حملے نہ صرف فلسطینی شہریوں بلکہ صحافیوں اور انسانی حقوق کے کارکنوں کے لئے بھی خطرہ بن چکے ہیں، جو زمینی حقائق دنیا کے سامنے لانے کی کوششوں میں مصروف ہیں۔

بلال رجب جیسے بہادر صحافیوں کی قربانی صحافت کی قدر و منزلت اور اس کے خطرات کو اجاگر کرتی ہے۔ فلسطینی عوام اور صحافتی برادری نے بلال رجب کو خراج عقیدت پیش کرتے ہوئے عالمی برادری سے مطالبہ کیا ہے کہ وہ صحافیوں کے تحفظ کے لئے فوری اور موثر اقدامات کرے تاکہ ایسے المناک واقعات کو روکا جا سکے۔