لاھور: پنجاب میں موٹرسائیکل ڈرائیونگ لائسنس کے خواہشمندوں کے لئے اہم اعلان، 30 نومبر تک شہری فوری لرنر اور لائسنس بنوا سکتے ہیں۔ ایڈیشنل آئی جی ٹریفک کی خصوصی ہدایات پر موٹرسائیکلسٹ کو لائسنس کے حصول میں رعایت دی گئی تھی، جس کے تحت اب 30 نومبر تک شہری بغیر 42 دن کی انتظار کی مدت کے فوراً لائسنس حاصل کر سکتے ہیں۔
ترجمان ٹریفک پنجاب کے مطابق 30 نومبر کے بعد، پرانی شرط دوبارہ نافذ ہوگی، جس میں لرنر پرمٹ کے بعد 42 دن کا انتظار لازمی ہوگا۔ اس دوران بڑی سہولت کے طور پر بڑے شہروں میں لائسنسنگ سینٹرز 24 گھنٹے دو شفٹوں میں کام کر رہے ہیں، تاکہ لوگوں کو لمبی قطاروں میں کھڑے ہونے کی ضرورت نہ پڑے۔
یاد رہے کہ یہ خصوصی رعایت گزشتہ ماہ سے جاری ہے، جس سے اب تک 11 لاکھ سے زائد شہری فائدہ اٹھا کر اپنے لائسنس بنوا چکے ہیں۔ ٹریفک قوانین کی خلاف ورزی پر کنٹرول اور سڑکوں پر حفاظتی اقدامات کو یقینی بنانے کے لیے یکم دسمبر سے بغیر لائسنس والے ڈرائیوروں کے خلاف سخت کارروائی کی جائے گی۔