اسلام آباد: اسلامی نظریاتی کونسل کے چیئرمین محمد راغب حسین نعیمی کی سربراہی میں ایک گیارہ رکنی وفد نے چینی حکومت کی دعوت پر چین کا دس روزہ دورہ کیا۔ دورے کے دوران وفد نے بیجنگ، شیان، کاشغر اور ارمچی کا دورہ کیا، جہاں انہیں چینی حکومت اور مسلم کمیونٹی کے مختلف نمائندوں سے ملاقات کرنے کا موقع ملا۔
اسلامی نظریاتی کونسل کے وفد نے چینی وزارت خارجہ کے حکام، مختلف شہروں میں مساجد کی کمیٹیوں، اور کمیونسٹ پارٹی کے رہنماؤں سے ملاقاتیں کیں۔ وفد نے سنکیانگ کے مختلف اسلامی مقامات جیسے شیان کی قدیمی مسجد اور کاشغر کی عیدگاہ مسجد کا بھی دورہ کیا۔ اس دوران، انہیں سنکیانگ مسلم انسٹی ٹیوٹ بھی لے جایا گیا جہاں مساجد کے لیے آئمہ اور خطیب تیار کیے جا رہے ہیں۔
چیئرمین اسلامی نظریاتی کونسل محمد راغب نعیمی نے چینی حکومت کی پالیسیوں کو سراہتے ہوئے کہا کہ سنکیانگ میں مسلمانوں کو معاشی اور مذہبی آزادی کے مواقع فراہم کیے جا رہے ہیں۔ انہوں نے کہا کہ چینی حکومت مذہبی اقلیتوں کے حقوق اور عبادت گاہوں کی تعمیر نو پر خاص توجہ دے رہی ہے۔ وفد نے سنکیانگ میں موجود مسلم رہنماؤں شیخ عبدالرقیب، شیخ ابراہیم اور شیخ جمعہ سے بھی ملاقات کی، جنہوں نے سنکیانگ میں جاری ترقیاتی کاموں پر اطمینان کا اظہار کیا۔
راغب نعیمی نے مزید کہا کہ 2016ء کے بعد سنکیانگ میں کیے گئے اقدامات کی وجہ سے دہشت گردی میں واضح کمی آئی ہے اور اب وہاں امن و استحکام ہے۔ انہوں نے پاکستان اور چین کے درمیان دہشت گردی اور شدت پسندی کے مسائل میں مماثلت کا ذکر کرتے ہوئے کہا کہ دونوں ممالک اس معاملے میں ایک دوسرے کے تجربات سے فائدہ اٹھا سکتے ہیں۔
وفد میں بیرسٹر ظفر اللہ خان، مولانا ڈاکٹر قاری محمد ضیاء الرحمن، مولانا حامد الحق حقانی، مولانا محمد ادریس، علامہ اللہ بخش کلیار، مولانا محمد طاہر، مولانا عبدالوحید اور دیگر شامل تھے۔