کراچی : این ای ڈی یونی ورسٹی آف انجینئرنگ اینڈ ٹیکنالوجی کے تحت انٹری ٹیسٹ کے پہلے سیشن کا انعقاد 4 مئی تا 6 مئی کیا جا رہا ہے جب کہ 6 مئی کی رات ٹیسٹ کے نتائج کا اعلان بذریعہ ویب سائٹ کر دیا جائے گا۔
معین الجامعہ پروفیسر ڈاکٹر محمد طفیل اور ایڈمیشن کمیٹی کے پروفیسر ڈاکٹر عامر اقبال کے مطابق اس بار بھی سالہاۓ گذشتہ کی طرح دو مرتبہ انٹری ٹیسٹ لیا جاۓ گا. ان کا کہنا تھا کہ ٹیسٹ کے دوسرے مرحلے کا اعلان بھی بذریعہ ویب سائٹ جلد کیا جاۓ گا۔
معین الجامعہ این ای ڈی کا مزید کہنا تھا کہ پہلے مرحلے میں کامیاب ہونے والے طالب علم دوسرے مرحلے میں شریک ہو کر (Improvement) بہتر نمبرز حاصل کر سکتے ہیں۔ جامعہ کی ترجمان کے مطابق حالیہ ٹیسٹ میں کراچی کے امیدواروں سمیت ملک بھر سے قریباً 8 ہزار طالبِ علموں کی شرکت متوقع ہے۔