حکومت نے اتحاد تنظیم المدارس کے تمام مطالبات تسلیم کر لیے
اسلام آباد: جمعیت علمائے اسلام (جے یو آئی) کے سربراہ مولانا فضل الرحمان کی سربراہی میں ایک وفد نے وزیر اعظم شہباز شریف سے ملاقات کی جس میں مدارس کی رجسٹریشن سمیت دیگر اہم امور پر تبادلہ خیال کیا گیا۔ ملاقات کے دوران حکومت اور جے یو آئی کے درمیان مدارس کی رجسٹریشن کے معاملے پر اہم پیش رفت سامنے آئی ہے۔
ذرائع کے مطابق، حکومت نے اتحاد تنظیم المدارس دینیہ کے تمام مطالبات کو تسلیم کرتے ہوئے یقین دہانی کرائی ہے کہ مدارس کی رجسٹریشن سوسائٹیز رجسٹریشن ایکٹ 1860 کے تحت ہی کی جائے گی۔ مزید یہ کہ 26ویں آئینی ترمیم کی روشنی میں تیار کردہ مسودے کو عملی جامہ پہنانے کے لیے نوٹیفکیشن چند روز میں جاری کر دیا جائے گا۔
اجلاس میں مدارس کے لیے سادہ اور شفاف رجسٹریشن کے عمل کو یقینی بنانے کے علاوہ دینی مدارس کے طلبہ اور اساتذہ کے مسائل کو حل کرنے کے عزم کا اعادہ کیا گیا۔ مولانا فضل الرحمان نے حکومت کی جانب سے تعاون پر اطمینان کا اظہار کیا اور اسے دینی مدارس کے حقوق کے تحفظ کی جانب ایک مثبت قدم قرار دیا۔
یہ ملاقات مدارس کے حوالے سے جے یو آئی کی کوششوں کا نتیجہ تھی جس میں انہوں نے حکومت کو دینی مدارس کے تحفظ اور ان کے قانونی حقوق کی اہمیت سے آگاہ کیا۔ اس پیش رفت سے مدارس کے نظام کو قانونی حیثیت دینے کے ساتھ ساتھ ان کے معاملات میں شفافیت بھی ممکن ہوگی۔