ہری پور (محمد آصف اعوان): خیبرپختونخوا حکومت نے یتیم طالبات کے لیے "انصاف فیمیل ایجوکیشن کارڈ” جاری کرنے کا فیصلہ کیا ہے، جس کا مقصد ان طالبات کو تعلیمی اخراجات میں سہولت فراہم کرنا ہے۔ اس پروگرام کے تحت یتیم طالبات کو کالج فیس میں رعایت دی جائے گی تاکہ وہ مالی مشکلات کے بغیر اپنی تعلیم جاری رکھ سکیں۔ صوبائی حکومت نے تمام کالجز کے سربراہان کو ہدایت دی ہے کہ وہ یتیم طالبات کے متعلقہ ڈیٹا ایک ہفتے کے اندر محکمہ ہائر ایجوکیشن کو فراہم کریں تاکہ اس اقدام کو جلد از جلد عملی جامہ پہنایا جا سکے۔
محکمہ ہائر ایجوکیشن نے اس اقدام کے لیے باضابطہ نوٹس جاری کر دیا ہے اور کالج انتظامیہ کو تاکید کی ہے کہ وہ یتیم طالبات کا ڈیٹا فراہم کریں، جس میں طالبات کے نام، تعلیمی پس منظر اور کالج میں موجودہ سالانہ فیس شامل ہوگی۔ اس ڈیٹا کی بنیاد پر ہر یتیم طالبہ کے لیے انصاف فیمیل ایجوکیشن کارڈ کا اجراء کیا جائے گا، جو تعلیمی اخراجات میں مدد فراہم کرے گا۔
خیبرپختونخوا حکومت کے اس احسن اقدام کا مقصد تعلیمی مواقع میں برابری لانا اور یتیم طالبات کو معاشرتی و تعلیمی سپورٹ فراہم کرنا ہے۔ حکومت کا ماننا ہے کہ اس کارڈ کے ذریعے یتیم طالبات پر مالی بوجھ کم ہوگا اور وہ یکسوئی سے اپنی تعلیم حاصل کر سکیں گی۔ اس اقدام کی بدولت نہ صرف یتیم طالبات کے لیے تعلیمی اخراجات میں رعایت حاصل ہوگی بلکہ ان کی تعلیمی کارکردگی میں بھی بہتری کی توقع ہے۔