نواز شریف کی کوٹ لکھپت جیل سے رہائی کی تیاریاں مکمل

سابق وزیر اعظم نواز شریف کی ضمانت پر رہائی کی روبکار کوٹ لکھپت جیل کی انتظامیہ کو موصول ہوگئی ، قانونی کارروائی مکمل کر لی گئی ،سیکیورٹی کیلیے گاڑیاں جیل کے دروازے پر پہنچ گئیں، تھوٰڑی دیر میں انہیں رہا کردیا جائے گا۔

نجی ٹی وی کے مطابق سابق وزیر اعظم نواز شریف کی العزیزیہ ریفرنس میں طبی بنیاروں پر ضمانت کی روبکار کوٹ لکھپت جیل کو بذریعہ فیکس موصول ہوگئی ہے۔نواز شریف کی روبکار رجسٹرار سپریم کورٹ نے جاری کی جس میں کہا گیا ہے کہ نوازشریف کسی اور کیس میں مطلوب نہیں تو انہیں رہا کردیا کر دیا جائے۔

قبل ازیں چیف جسٹس پاکستان آصف سعید کھوسہ کی سربراہی میں سپریم کورٹ کے تین رکنی بنچ نے سابق وزیراعظم نواز شریف کی طبی بنیادوں پر درخواستِ ضمانت کی سماعت کی تھی۔

سپریم کورٹ نے 50 لاکھ روپے کے مچلکے کے عوض نواز شریف کی 6 ہفتوں کے لیے ضمانت منظور کرلی، تاہم انہیں بیرون ملک جانے کی اجازت نہیں ہوگی،وہ پاکستان میں ہی اپنی مرضی کے ڈاکٹر اور اسپتال سے علاج کراسکتے ہیں۔

سپریم کورٹ نے نواز شریف کو 2 ضمانتی بھی دینے کا حکم دیتے ہوئے کہا کہ انہیں چھ ہفتے بعد خود گرفتاری دینی ہوگی، اگر انہوں نے ایسا نہ کیا تو انہیں گرفتار کرکے پیش کیا جائے۔

عدالت عظمیٰ نے فیصلے میں کہا کہ اگر نواز شریف کو طبی بنیادوں پر دوبارہ ضمانت درکار ہو تو اس کے لئے انہیں اسلام آباد ہائی کورٹ میں دوبارہ درخواست دینی ہوگی، پھر ہائی کورٹ میرٹ پر کوئی فیصلہ کرے گی .

Comments: 0

Your email address will not be published. Required fields are marked with *