کراچی: وائس چانسلر ڈاؤ یونیورسٹی آف ہیلتھ سائنسز، پروفیسر محمد سعید قریشی نے تپ دق (ٹی بی) کے علاج کے لیے ملکی اور بین الاقوامی غیر سرکاری تنظیموں کے ساتھ شراکت داری کو مزید مضبوط بنانے کا عزم ظاہر کیا ہے۔ انہوں نے کہا کہ اوجھا انسٹی ٹیوٹ آف چیسٹ ڈیزیز میں ٹی بی کے علاج کی معیاری سہولیات فراہم کی جا رہی ہیں اور انہیں مزید بہتر کرنے کے لیے کوششیں جاری ہیں۔
یہ بات انہوں نے اوجھا انسٹی ٹیوٹ میں منعقد ہونے والے ایک ویبینار کے دوران کہی، جس میں عالمی ادارہ صحت (ڈبلیو ایچ او) کے تعاون سے ٹی بی پریوینٹیو ٹریٹمنٹ (ٹی پی ٹی) پر توجہ مرکوز کی گئی۔ ویبینار میں ڈبلیو ایچ او کے مختلف عالمی اور علاقائی ماہرین نے شرکت کی اور ٹی بی کے علاج، روک تھام، اور چیلنجز پر روشنی ڈالی۔
پروفیسر قریشی نے قومی اور بین الاقوامی تنظیموں کے ساتھ یونیورسٹی کے تعاون کو مزید مضبوط بنانے کے عزم کا اعادہ کیا تاکہ تپ دق کے خلاف جنگ میں مزید کامیابی حاصل کی جا سکے۔ ویبینار کے دوران تپ دق کی روک تھام اور علاج میں درپیش چیلنجز اور ان کے حل پر تبادلہ خیال کیا گیا۔