لاہور: گورنر پنجاب سردار سلیم حیدر خان نے عید میلادالنبی ﷺکے موقع پر اپنے پیغام میں کہا ہے کہ آج ہم خاتم النبین حضرت محمدﷺکی ولادت با سعادت کی خوشی منا رہے ہیں۔یہ وہ مبارک دن ہے جب رب کائنات نے محبوب کائنات کو تمام جہانوں کے لئے رحمت بنا کر بھیجا اور ساتھ ہی ختم نبوت کی مہر بھی ثبت کر دی۔ آپﷺ کی سیرت طیبہ پر عمل دنیا اور آخرت میں کامیابی کا ذریعہ ہے۔
نبی آخر زماں نے امن،برداشت اور احترام انسانیت کا درس دیا۔ محسن انسانیت نے معاشرے کے مظلوم اور پسے ہوئے طبقات کو حقوق دئیے۔ آج کے دن ہمیں یہ عہدکرنا ہے کہ ہم نبی پاکﷺ کی تعلیمات پر عمل کریں گے۔ اللہ تعالیٰ ہمیں آپ ﷺکی تعلیمات پر عمل کرنے کی توفیق عطا فرمائے۔