اسلام آباد: وفاقی حکومت کی جانب سے افسران کے تقرر و تبادلے کیے گئے ہیں۔ ایڈیشنل ڈائریکٹر جنرل پاکستان ایئرپورٹ اتھارٹی ایئر وائس مارشل تیمور اقبال سبکدوش ہو گئے ہیں، جبکہ ان کی جگہ ایئر وائس مارشل ذیشان سعید کو ایڈیشنل ڈائریکٹر جنرل پاکستان ایئرپورٹ اتھارٹی مقرر کیا گیا ہے۔
اس کے علاوہ ونگ کمانڈر محمد سلمان خان کو ایڈیشنل ڈائریکٹر (ٹیکنیکل انویسٹیگیشن) بیورو آف ایئرکرافٹ سیفٹی انویسٹیگیشن مقرر کیا گیا ہے۔ محمد سلمان خان بطور ٹیکنیکل انویسٹی گیٹر اپنی ذمہ داریاں انجام دیں گے۔ یہ تقرریاں سیکنڈمنٹ کی بنیاد پر کی گئی ہیں اور فوری طور پر نافذ العمل ہوں گی۔ ان تقرریوں کے ضمن میں وزیراعظم کی منظوری کے بعد اسٹیبلشمنٹ ڈویژن نے باضابطہ نوٹیفکیشن بھی جاری کر دیا ہے۔
مزید برآں، اسٹیبلشمنٹ ڈویژن کی جانب سے جاری کردہ ایک اور نوٹیفکیشن کے مطابق اسٹیبلشمنٹ ڈویژن میں تقرری کے منتظر پاکستان ایڈمنسٹریٹو سروس گریڈ 17 کے محمد ابراہیم شاہ کی خدمات سول سروسز اکیڈمی لاہور کے سپرد کر دی گئی ہیں۔ اسی طرح سیکشن افسر وزارتِ بحری امور نوید سکندر کا تبادلہ کرکے انہیں اسٹیبلشمنٹ ڈویژن رپورٹ کرنے کا نوٹیفکیشن منسوخ کیا گیا ہے۔