امریکہ کی پاکستان پر پابندیاں بوکھلاہٹ کا مظہر، پاکستانی دفاع پر پوری قوم متحد: سینیٹر پروفیسر ساجد میر
اسلام آباد: سینیٹر پروفیسر ساجد میر نے امریکہ کی جانب سے پاکستان پر عائد پابندیوں کو شدید تنقید کا نشانہ بناتے ہوئے اسے بوکھلاہٹ اور منافقت قرار دیا ہے۔ انہوں نے کہا کہ امریکہ نے ہمیشہ اسرائیل اور بھارت کی اسلحہ سازی اور فوجی طاقت پر دوہرا معیار اپنایا ہے، لیکن پاکستان کے ایٹمی اور میزائل پروگرام پر اعتراض کرنا غیر منصفانہ ہے۔
پروفیسر ساجد میر نے کہا کہ پاکستان کا ایٹمی اور میزائل پروگرام مکمل طور پر پرامن ہے اور ملکی دفاع کے لیے ناگزیر ہے۔ یہ پروگرام قوم کی بقا اور خودمختاری کی ضمانت ہے۔ پوری پاکستانی قوم امریکی پابندیوں کی مذمت کرتی ہے اور ان کے خلاف متحد ہے۔
انہوں نے مزید کہا کہ پاکستانی حکومت کو امریکہ کے دباؤ کا بھرپور جواب دینا چاہیے اور واضح پیغام دینا چاہیے کہ قوم اپنے دفاعی پروگرام کے تحفظ کے لیے کسی بھی قربانی سے دریغ نہیں کرے گی۔
سینیٹر ساجد میر نے اس عزم کا اظہار کیا کہ پاکستان اپنی ایٹمی اور میزائل ٹیکنالوجی کے لیے تمام تر چیلنجز کا سامنا کرے گا اور امریکی دباؤ کو مسترد کرتے ہوئے اپنی خودمختاری کا دفاع کرے گا۔
