اسلام آباد: روس کی فیڈریشن کونسل کی چیئرپرسن ویلنٹینا مٹوینکو تین روزہ دورے پر پاکستان پہنچ گئی ہیں۔ ان کے اس دورے کا مقصد پاکستان اور روس کے درمیان سفارتی اور پارلیمانی تعلقات کو مزید مضبوط بنانا ہے۔
تفصیلات کے مطابق ویلنٹینا مٹوینکو اتوار کو اسلام آباد پہنچیں۔ اپنے دورے کے دوران وہ صدرِ پاکستان آصف علی زرداری اور وزیراعظم شہباز شریف سمیت اعلیٰ پاکستانی قیادت سے ملاقاتیں کریں گی۔ اس کے علاوہ، وہ ایوانِ بالا (سینیٹ) کے خصوصی اجلاس سے خطاب کریں گی جس میں پاک روس تعلقات کی مضبوطی پر زور دیا جائے گا۔
وزارتِ خارجہ کے ترجمان کے مطابق، اس دورے میں اعلیٰ سطحی بات چیت اور اسٹریٹجک امور پر تبادلہ خیال کیا جائے گا، جو دونوں ممالک کے درمیان تعلقات میں مزید قربت کا باعث بن سکتا ہے۔ روسی وفد کی قیادت میں ویلنٹینا مٹوینکو کو پاکستان کے چیئرمین سینیٹ یوسف رضا گیلانی کی دعوت پر بلایا گیا ہے۔
اس دورے کو خطے کی حالیہ کشیدہ صورتحال کے تناظر میں بھی خاص اہمیت دی جارہی ہے۔ جہاں ایران پر اسرائیل کے حملے کے بعد خطے میں کشیدگی بڑھ گئی ہے، پاکستان اپنے متوازن سفارتی تعلقات کے ذریعے امن کے فروغ کی کوششوں میں مصروف ہے۔
ویلنٹینا مٹوینکو روس کی معروف سیاستدان ہیں اور فیڈریشن کونسل کی چیئرپرسن کی حیثیت سے 2011 سے خدمات انجام دے رہی ہیں۔ مٹوینکو 2003 سے 2011 تک سینٹ پیٹرزبرگ کی گورنر بھی رہ چکی ہیں اور انہیں صدر ولادیمیر پوتن کے قریبی ساتھیوں میں شمار کیا جاتا ہے۔
