کراچی : فیڈرل انویسٹی گیشن (ایف آئی اے) امیگریشن سیالکوٹ ایئرپورٹ کی سالانہ کارکردگی رپورٹ کے مطابق سال 2025 کے دوران ایف آئی اے امیگریشن نے سیالکوٹ ائرپورٹ پر بین الاقوامی آمد اور روانگی پر 9 لاکھ سے زائد مسافروں کو کامیابی سے پروسیس کیا ہے ۔
تفصیلات کے مطابق سال 2025 کے دوران 2824 پروازوں سے 4 لاکھ 80 ہزار مسافر سیالکوٹ ائرپورٹ سے روانہ ہوئے۔ سال 2025 کے دوران 2825 پروازوں سے 4 لاکھ 60 ہزار مسافر مختلف ممالک سے سیالکوٹ ائرپورٹ پہنچے ۔
سال 2025 کے دوران ایف آئی اے امیگریشن سیالکوٹ نے سنگین جرائم میں مطلوب 116 ملزمان کو گرفتار کیا گیا ہے اور گرفتار ملزمان میں 43 ملزمان کو بیرون ملک فرار ہونے پر جبکہ 73 ملزمان کو پاکستان پہنچنے پر گرفتار کیا گیا۔ گرفتار ملزمان کے نام اسٹاپ لسٹ میں شامل تھے۔
گرفتار ملزمان میں 24 پنجاب پولیس 28 ملزمان اینٹی ہیومن ٹریفکنگ سرکلز کو مطلوب تھے۔ سال 2025 کے دوران بیرون ملک جانے والے 44 مسافروں کو جعلی دستاویزات پر بیرون ملک جانے سے روک دیا گیا ۔غیر قانونی سمندر کے راستے یورپ جانے کی کوشش کرنے والے 83 مسافروں کو بھی بیرون ملک جانے سے روک دیا گیا۔
مذکورہ مسافروں سے براستہ لیبیا اور بعد ازاں غیر قانونی سمندر کے راستے یورپ جانے کے شواہد برامد کئے گئے ۔ سال 2025 کے دوران 18 مسافروں کو جعلی ویزا ، ٹمپرڈ پاسپورٹ اور جعلی مہروں پر پاکستان پہنچنے پر گرفتار کیا گیا ۔ انسانی سمگلنگ جیسے گھناونے جرم کی روک تھام کے لئے خصوصی اقدامات کئے گئے ۔
ائرپورٹ پر تعینات امیگریشن حکام کے لئے انٹرنیشنل اداروں کی معاونت سے 8 ٹریننگ کا انعقاد کیا گیا ۔ سال 2025 کے دوران 114 سے زائد امیگریشن افسران کو انسانی سمگلنگ کی روک تھام کے حوالے سے ٹریننگ دی گئی۔
