کراچی : فیڈرل بورڈ آف ریونیو کی جانب سے متروکہ وقف املاک بورڈ کے بینک اکاؤنٹس خالی کرنے سے ادارے کو شدید مسائل کا سامنا کرنا پڑ رہا ہے ۔ ایف بی آر نے ٹیکس کی مد میں متروکہ وقف املاک بورڈ کے مختلف بینک اکاؤنٹس سے ایک ارب 20 کروڑ روپے ریکور کر لئے ہیں ۔
تفصیلات کے مطابق ادارے کے پاس ملازمین کو تنخواہوں اور پنشن کی ادائیگی کے لئے بھی شعبہ اکاؤنٹس کے پاس فنڈز دستیاب نہیں ۔ اس سے قبل بھی ایف بی آر نے جون میں 94 کروڑ روپے کی ٹیکس ریکوری کی تھی ۔
وقف املاک بورڈ کا موقف ہے کہ متروکہ وقف املاک بورڈ ٹرسٹ ادارہ ، تمام سرکاری پراپرٹی ، ٹیکس کٹوتی بلا جواز ہے ، ذرائع کے مطابق چیئرمین متروکہ وقف املاک بورڈ ساجد محمود چوہان نے اس اقدام کو نا انصافی قرار دیتے ہوئے چیئرمین ایف بی آر کو مراسلہ تحریر کیا ہے ۔
متروکہ وقف املاک بورڈ کا موقف ہے کہ یہ ٹیکس کٹوتی بلا جواز ہے کیونکہ متروکہ وقف املاک بورڈ ایک ٹرسٹ ادارہ ہے ۔ یہ تمام سرکاری پراپرٹی ہے ۔ آئین کے آرٹیکل 165اے تحت سرکاری املاک کو ٹیکس سے استثنی حاصل ہے ۔
