فتح جنگ: تھانہ فتح جنگ پولیس نے ایک ایسے ملزم کو گرفتار کیا ہے جو خود کو سرکاری ملازم بنا کر دوکانداروں کو دھوکہ دے کر رقم بٹورتا رہا۔
تفصیلات کے مطابق، ضمیر حسین ولد قربان حسین نے تھانہ فتح جنگ میں درخواست دی کہ اس کی گیس سلنڈرز کی دوکان کھوڑ روڈ پر واقع ہے۔ 13 نومبر کو ایک شخص اس کی دوکان پر آیا جس کے موٹر سائیکل پر سرکاری نمبر پلیٹ لگی ہوئی تھی۔ اس شخص نے اپنا نام امجد شاہد ولد عبدالواحد بتایا اور کہا کہ وہ جنڈ کا رہائشی ہے اور سول ڈیفنس میں ملازم ہے۔ اس نے اپنا کارڈ بھی دکھایا اور کہا کہ اس کا کام سلنڈروں کی دوکانوں کی چیکنگ کرنا ہے تاکہ یہ تصدیق کی جا سکے کہ سلنڈرز اوگرا سے رجسٹرڈ ہیں یا نہیں۔
یہ شخص پہلے بھی کئی بار ضمیر حسین کی دوکان پر آ چکا تھا اور مختلف اوقات میں رقم وصول کرتا رہا تھا۔ تاہم، اس مرتبہ اس نے 50 ہزار روپے مانگے اور دھمکی دی کہ اگر رقم نہ دی گئی تو دوکان سیل کر دی جائے گی اور سلنڈرز کو اٹک بھیج دیا جائے گا۔ اس نے مزید بتایا کہ وہ دوسرے دوکانداروں سے بھی پیسے لے کر افسران کو دیتا ہے۔ خوف کی وجہ سے ضمیر حسین نے 50 ہزار روپے دے دیے، حالانکہ اس شخص نے اس سے پہلے ایک لاکھ روپے بھی وصول کیے تھے۔
دیگر دوکانداروں سے بھی رقم لی گئی تھی۔ احسان انجم ولد محمد یوسف سے 25 ہزار روپے، محمد حسنین ولد ظفر اقبال سے 15 ہزار روپے، فرہاد ولد رحمت سے 20 ہزار روپے اور محمد رمضان ولد میاں جمعہ سے بھی 20 ہزار روپے بٹورے گئے تھے۔
بعد میں یہ معلوم ہوا کہ امجد شاہد سرکاری ملازم نہیں تھا جیسا کہ اس نے دعویٰ کیا تھا۔ تھانہ فتح جنگ پولیس نے مقدمہ درج کر کے تفتیش کی اور امجد شاہد ولد عبدالواحد، سکنہ جنڈ، کو گرفتار کر لیا۔ پولیس نے ملزم کو عدالت میں پیش کر کے کارروائی مکمل کی۔
