لاہور: پاکستان کے مشہور گلوکار عاطف اسلم نے سعودی عرب میں اپنی پرفارمنس کے حوالے سے چلنے والی افواہوں پر خاموشی توڑ دی ہے۔
‘عادت’ جیسے ہٹ گانے سے شہرت پانے والے عاطف اسلم نے ایک بیان میں ان افواہوں کی سختی سے تردید کی ہے جن میں کہا گیا کہ انہوں نے سعودی عرب میں مقدس مقامات کے قریب پرفارم کرنے سے انکار کیا ہے۔
عاطف اسلم نے اپنے بیان میں کہا، "یہ عجیب ہے کہ میرے نام سے وہ باتیں منسوب کی جاتی ہیں جو میں نے کبھی کہی ہی نہیں۔” انہوں نے میڈیا اور فنکار برادری پر زور دیا کہ وہ کسی بھی بیان کی سچائی کو جانچنے کے بعد ہی رپورٹ کریں۔
انہوں نے وضاحت کی کہ "ہم نے ماضی میں ریاض میں پرفارم کیا ہے، جو ہمارے موقف کا بہترین ثبوت ہے۔” ان کا یہ بیان سوشل میڈیا پر ایک جعلی بیان کے بعد آیا جس میں دعویٰ کیا گیا کہ عاطف کا دل مقدس مقامات کے قریب پرفارم کرنے کو قبول نہیں کرتا۔
یاد رہے کہ سعودی عرب 2017 کے بعد سے عالمی فنکاروں کے کنسرٹس کا مرکز بن گیا ہے اور اب تک کئی بڑے بین الاقوامی اسٹارز، جیسے کہ K-pop کے مشہور گروپ BTS بھی یہاں پرفارم کر چکے ہیں۔
عاطف اسلم نہ صرف پاکستان بلکہ بالی وڈ کے ہٹ گانوں جیسے ‘دل دیاں گلاں’ اور ‘تو جانے نا’ کے لیے بھی جانے جاتے ہیں۔
