عمرکوٹ، سندھ سے سول سوسائٹی کے ایک وفد نے قومی رحمت للعالمین و خاتم النبیین اتھارٹی کا دورہ کیا۔ اس وفد میں سول سوسائٹی سپورٹ پروگرام، عمرکوٹ سٹیزنز فورم، ڈسٹرکٹ ویمن گروپ عمرکوٹ، سندھ آبادی سنگت اور دیگر تنظیموں کے نمائندگان شامل تھے، جو مسلمانوں سمیت مختلف مذہبی پس منظر رکھنے والے افراد پر مشتمل تھے۔
وفد کا استقبال چیئرمین رحمت للعالمین و خاتم النبیین اتھارٹی جناب خورشید احمد ندیم نے گرمجوشی سے کیا اور اتھارٹی کی بین المذاہب ہم آہنگی کے فروغ میں اٹھائے گئے اہم اقدامات اور سال 2023-24 کی پیش رفت پر روشنی ڈالی۔ انہوں نے اس موقع پر سالانہ رپورٹ بھی پیش کی، جس میں اتھارٹی کی خدمات اور مختلف اقدامات کا تفصیلی ذکر تھا۔
سول سوسائٹی سپورٹ پروگرام کے مینیجر میر حسام آریسر اور دیگر ممبران نے اتھارٹی کی کاوشوں کو سراہا اور سیرت النبیﷺ کی تعلیمات کی روشنی میں بین المذاہب ہم آہنگی کے فروغ کے لیے تجاویز پیش کیں۔ اتھارٹی کے ڈائریکٹر جناب سہیل بن عزیز نے بھی تقریب میں خطاب کرتے ہوئے اتھارٹی کی مختلف سرگرمیوں اور اقدامات پر روشنی ڈالی، جن کا مقصد معاشرتی ہم آہنگی کو فروغ دینا ہے۔
دورے کے اختتام پر مہمانوں کو یادگاری شیلڈ پیش کی گئی، جس سے یہ ملاقات یادگار بن گئی اور بین المذاہب ہم آہنگی کے لیے ایک مثبت قدم قرار پائی۔ اس دورے کو مختلف حلقوں میں سراہا گیا اور اتھارٹی کی کاوشوں کو معاشرتی یکجہتی کی اہمیت کو اجاگر کرنے میں کامیاب قرار دیا گیا۔
