ہری پور (محمد آصف اعوان): پاکستان ملٹری اکیڈمی (PMA) کاکول ایبٹ آباد میں 150ویں پی ایم اے لانگ کورس کے کیڈٹس کی پاسنگ آؤٹ پریڈ کا انعقاد ہوا۔ اس تقریب کے مہمان خصوصی چیئرمین جوائنٹ چیفس آف سٹاف کمیٹی، جنرل ساحر شمشاد مرزا تھے۔ تقریب میں مختلف ممالک کے کیڈٹس نے بھی شرکت کی، جن میں عراق، اردن، مالدیپ، سری لنکا کے کیڈٹس شامل ہیں جبکہ نیپال، فلسطین، سوڈان اور یمن سمیت دیگر دوست ممالک کے کیڈٹس نے بھی گریجویشن مکمل کی۔
آئی ایس پی آر کے مطابق اس پاسنگ آؤٹ پریڈ میں 69ویں انٹیگریٹڈ کورس، 24ویں لیڈی کیڈٹ کورس اور 36ویں ٹیکنیکل گریجویٹ کورس کے کیڈٹس بھی پاس آؤٹ ہوئے۔ جنرل ساحر شمشاد مرزا نے پریڈ کا معائنہ کیا اور کیڈٹس کو ایوارڈز دیے۔
سینئر انڈر آفیسر عبداللہ افضل کو اعزازی تلوار سے نوازا گیا جبکہ سینئر انڈر آفیسر بابر اللہ امان کو صدارتی گولڈ میڈل عطا کیا گیا۔ چیئرمین جوائنٹ چیفس آف سٹاف کمیٹی اوورسیز گولڈ میڈل نیپال سے سینئر انڈر آفیسر کشتیج گرونگ کو دیا گیا، اور چیف آف آرمی سٹاف کین 36ویں ٹیکنیکل گریجویٹ کورس کے جونیئر انڈر آفیسر محمد عمر شیراز کو عطا کی گئی۔
اس کے علاوہ 69ویں انٹیگریٹڈ کورس کے جونیئر انڈر آفیسر محمد سلیمان اور 24ویں لیڈی کیڈٹ کورس کی انڈر آفیسر پاکیزہ یعقوب کو کمانڈنٹ کینز سے نوازا گیا۔
پریڈ کے دوران پاس آؤٹ ہونے والے کیڈٹس نے شاندار ڈرل مہارت کا مظاہرہ کیا۔ اس پرجوش تقریب میں ملکی و غیر ملکی مندوبین کے علاوہ کیڈٹس کے اہلخانہ بھی شریک ہوئے۔
