اسلام آباد (نمائندہ خصوصی): اسپیکر قومی اسمبلی سردار ایاز صادق نے پارلیمنٹ ہاؤس میں ممتاز اسلامی اسکالر ڈاکٹر ذاکر نائیک کا استقبال کیا۔ ملاقات میں امت مسلمہ کو درپیش چیلنجز، بین المذاہب ہم آہنگی اور دیگر اہم امور پر تفصیلی تبادلہ خیال کیا گیا۔
ڈاکٹر ذاکر نائیک نے پاکستانی عوام کی محبت کا شکریہ ادا کرتے ہوئے کہا کہ امت مسلمہ کو اپنے اختلافات کو بھلا کر قرآن و سنت کی روشنی میں متحد ہونے کی ضرورت ہے۔ انہوں نے امت مسلمہ کو درپیش مسائل کا واحد حل اتحاد و یکجہتی میں قرار دیا اور دنیا بھر میں اسلام کے امن اور محبت کے پیغام کو عام کرنے کی کوششوں پر زور دیا۔
اسپیکر قومی اسمبلی سردار ایاز صادق نے کہا کہ اسلام مکمل ضابطہ حیات ہے اور اس کی تعلیمات امن، رواداری اور محبت کا پیغام دیتی ہیں۔ انہوں نے ڈاکٹر ذاکر نائیک کی عالمی سطح پر اسلام کے امن و محبت کے پیغام کو فروغ دینے کی کوششوں کو سراہتے ہوئے کہا کہ پاکستان عالمی سطح پر امن اور مذہبی ہم آہنگی کے فروغ کے لیے بھرپور کردار ادا کر رہا ہے۔
ڈاکٹر ذاکر نائیک نے اس موقع پر کہا کہ ان کی تبلیغی سرگرمیوں کا مقصد دنیا میں اسلام کی حقیقی تعلیمات کو اجاگر کرنا اور لوگوں کو اسلام کے امن و محبت کے پیغام سے روشناس کرانا ہے۔ انہوں نے پاکستان کے کردار کو سراہتے ہوئے کہا کہ امت مسلمہ کو درپیش چیلنجز کا حل اتحاد بین المسلمین میں مضمر ہے۔
ملاقات کے بعد اسپیکر قومی اسمبلی سردار ایاز صادق نے ڈاکٹر ذاکر نائیک کے ہمراہ پارلیمنٹ ایوان کا دورہ بھی کیا۔
