خانپور: تھانہ خانپور چوکی پنڈ منیم کی حدود سے گاؤں گھماواں کے تین بچے دن دیہاڑے اغواء کر لیے گئے۔ موٹر سائیکل پر سوار تین بچوں کو پہلے ایک گاڑی نے ٹکر ماری، جس سے وہ گر گئے۔ ملزمان نے بچوں کو ہسپتال لے جانے کے بہانے گاڑی میں بٹھایا اور فرار ہو گئے۔ بعد ازاں، ایک بچے کو ہری پور منگ کی حدود میں زخمی حالت میں پھینک دیا گیا جبکہ دوسرے بچے کو ٹھلیاں انٹرچینج لاہور موٹروے پر چھوڑا گیا۔
تیسرا بچہ، وقاص ولد محمد زاہد سکنہ چمتری گھماواں، ابھی تک لاپتہ ہے، جس پر علاقے میں شدید تشویش پائی جاتی ہے۔ اس واقعے پر علاقہ مکینوں میں خوف و ہراس پیدا ہو گیا ہے۔
اہلِ خانہ اور مقامی افراد نے ڈی پی او ہری پور، وزیر اعلیٰ خیبر پختونخوا، اور آئی جی خیبر پختونخوا پولیس سے فوری نوٹس لینے اور مغوی وقاص کی بازیابی کے لیے اپیل کی ہے۔ عوامی سطح پر اس معاملے کی فوری تحقیقات اور مجرموں کو گرفتار کرنے کا مطالبہ کیا جا رہا ہے تاکہ متاثرہ خاندان کو انصاف مل سکے۔
