سربراہ پاکستان سنی تحریک محمد شاداب رضا نقشبندی نے کہا ہے کہ مظلوموں کے لیے آواز بلند کرنا اور ان کے زخموں پر مرہم رکھنا بھی جہاد ہے۔ عدل و انصاف کی بالادستی اور عوام کے حقوق کے حصول کے لیے حسینی فکر پر گامزن ہونا ہوگا۔ انہوں نے کہا کہ فلسطین اور کشمیر میں اسلام دشمن طاقتیں مسلم نسل کشی میں مصروف ہیں، اور موجودہ حالات انتہائی کشیدہ ہیں۔
محمد شاداب رضا نقشبندی نے کہا کہ اگر مسلم ممالک متحد ہوجائیں تو وہ ظالموں اور غاصبوں سے فلسطین اور کشمیر کے مسلمانوں کو ہفتوں میں نجات دلا سکتے ہیں۔ انہوں نے مسلم حکمرانوں کو مخاطب کرتے ہوئے کہا کہ وہ غیرت ایمانی کا مظاہرہ کریں اور فلسطین و کشمیر کے مظلوموں کو انصاف دلانے کے لیے کلمہ حق بلند کریں۔
کراچی سے جاری بیان میں، انہوں نے کہا کہ عدل و انصاف کے نظام کے بغیر معاشی استحکام ممکن نہیں ہے۔ اسرائیل نہتے فلسطینیوں اور بچوں پر بمباری کر رہا ہے، اور کوئی اس کو لگام دینے والا نہیں ہے۔ کفر کی قوتوں کو پناہ دینے والوں کا انجام فرعون اور یزید جیسا ہوگا۔
سنی تحریک کے سربراہ نے مزید کہا کہ امام حسین نے ظالموں کے سامنے کلمہ حق بلند کیا تھا، اور آج فلسطینی و کشمیری حسینیت کے جذبے سے سرشار ہیں۔ اقوام متحدہ اور عالمی ادارے، جو مظلوموں کو انصاف فراہم نہیں کر رہے، دنیا کے امن کو خطرے میں ڈال رہے ہیں۔
انہوں نے اسرائیل کو دہشتگرد ریاست قرار دینے اور اس پر معاشی و اقتصادی پابندیاں لگانے کا مطالبہ کیا، اور کہا کہ اُمت مسلمہ نے اسرائیلی مصنوعات کے بائیکاٹ کے ذریعے مظلوموں سے یکجہتی کا مظاہرہ کیا ہے۔
شاداب رضا نقشبندی نے کہا کہ اقوام متحدہ کا کردار مشکوک ہوچکا ہے، اور عالمی ادارے مظلوم فلسطینیوں کے حق میں کچھ نہیں کر رہے۔
