کراچی : جناح سندھ میڈیکل یونیورسٹی کے انسٹی ٹیوٹ آف فارما سوٹیکل سائنسز (آئی پی ایس) کی جانب سے پہلے فارما کیریئر فیئر کا انعقاد کیا گیا جس میں ملک کی نامور فارما کمپنیز نے طلبا و طالبات کے انٹرویوز لیکر کامیاب امیدواروں کو نوکریوں و انٹرن شپ کی پیشکش کی ،ساتھ ہی ان کی کیریئر کونسلنگ بھی کی گئی ۔
جناح سندھ میڈیکل یونیورسٹی کے وائس چانسلر پروفیسر امجد سراج میمن نے رجسٹرار ڈاکٹر اعظم خان کے ہمراہ کیریئر فیئرکا دورہ کیا اور آئی پی ایس کی کاوشوں کو سراہتے ہوئے کہا کہ کیریئر فیئر کے ذریعے انڈسٹری کے ساتھ جامعہ سے فارغ ہونے والے طلبا و طالبات کا رابطہ انتہائی مفید ثابت ہوتا ہے، ملک کی نامور فارماسیوٹیکل کمپنیز کا جناح سندھ میڈیکل یونیورسٹی کے کیریئر فیئر میں شرکت کرنا اس بات کی ترجمانی کر رہا ہے کہ یہاں کے طلبا وطالبات فارما انڈسٹری میں موجود نوکریوں کیلئے بھرپور صلاحیتوں سے لبریز امیدوار ہیں۔
آئی پی ایس کی پرنسپل پروفیسر ہما علی نے کیریئر فیئر کادورہ کر کے انتظامات کا جائزہ لیا اور اس موقع پر کہا کہ آج ایک انتہائی اہم نوعیت کے ایونٹ کا انعقاد کیا گیا ہے جس کا مقصد ان طلباء کو قیمتی اور متنوع مواقع فراہم کرنا ہے جو اس انسٹیٹیوٹ سے بہت جلد فارغ التحصیل ہو رہے ہیں،انہیں امید ہے کہ یہ کیریئر فیئر تعلیمی اداروں اور صنعتوں کے درمیان موجود خلا کو پُر کرے گا اور دونوں کے درمیان رابط کو اعلیٰ سطح پر استوار کریگا۔
مذید پڑھیں : چیئرمین مرکزی رؤیت ہلال کمیٹی عبدالخبیر آزاد کی مولانا مفتی تقی عثمانی سے ملاقات اور اظہار تعزیت
ایونٹ کے مہمان خصوصی ہائی کیو فارما کے منیجنگ ڈائریکٹر عاطف اقبال اور جانسن ویکٹر اینڈ جاسپر ہیلتھ کیئر کے سی ای او ڈاکٹر اسد عباس نے پہلے فارما کیریئر فیئرکا افتتاح کرتے ہوئے اس طرح کے ایونٹس کے مستقبل میںبھی انعقاد پر زور دیا۔
کیریئر فیئر کی آرگنائزر پروفیسر کرن رفیق نے ان تمام اسٹیک ہولڈرز اور معزز شراکت داروں کا شکریہ ادا کیا جنہوں نے اس کیریئر فیئر کو کامیاب بنانے میں اپنا کردار ادا کیا ، آرگنائزرز میں پروفیسر کرن رفیق کے علاوہ ایسوسی ایٹ پروفیسر ڈاکٹر شہلا امام، اسسٹنٹ پروفیسر ڈاکٹر احسن احمد، لیکچرارز ڈاکٹر انس حنیف، ڈاکٹر سلیمان، ڈاکٹر حسان احمد اور ڈاکٹر احد میمن شامل تھے۔ طلبا و طالبات نے بھی کیریئر فیئر کے انعقاد کو خوش آئند قرار دیا۔
