کراچی : پرائم منسٹرز یوتھ پروگرام کے تحت ہائیر ایجوکیشن کمیشن نے سرسید یونیورسٹی، کراچی کے اشتراک سے ٹیلنٹ ہنٹ یوتھ اسپورٹس لیگ کے ہاکی ٹرائلز سندھ میں مکمل کر لیے ۔
ہاکی کے ٹرائلز پانچ مراحل میں منعقد ہوئے۔ ہاکی کے ٹرائلز کا آغاز کراچی سے ہوا۔ جبکہ حیدرآباد، شہید بینظیر آباد، لاڑکانہ اور سکھر میں بھی مرحلہ وار ٹرائلز منعقد کیے گئے جن میں 15 سے 25 سال کے تقریباً 1500 سے زائد نوجوان کھلاڑیوں نے حصہ لیا.
یاد رہے وزیر اعظم پاکستان کے وژن کو مدنظر رکھتے ہوئے ملک بھر کے نوجوانوں کو کھیلوں کے میدان میں مساوی مواقع فراہم کرنے کے لیے ملک بھر کے 25 اضلاع میں ٹیلنٹ ہنٹ یوتھ اسپورٹس لیگ کے تحت ہاکی کے ٹرائلز ہائیر ایجوکیشن کمیشن جامعات کے اشتراک سے منعقد کروا رہا ہے ۔
مذید پڑھیں : نماز جنازہ میں شرکت کرنے والے علماء اور عوام کیلئے دارالعلوم کراچی کی اہم ہدایات جاری
سندھ میں مکمل ہونے والے ٹرائلز اسی سلسلے کی ایک کڑی ہیں ۔ ان ٹرائلز میں بہترین کھیل دکھانے والے کھلاڑیوں کی ٹیموں کے مابین پراونشل لیگ کا انعقاد ہو گا اور پراونشل لیگ کی فاتح ٹیموں کو کوچنگ کے بعد نیشنل لیگ میں حصہ لینے کا موقع دیا جائے گا ۔
وزیر اعظم کی مشیر برائے امور نوجوانان شزہ فاطمہ خواجہ نے سندھ میں ٹرائلز کی تکمیل پر اظہار خیال کرتے ہوئے کہا کہ حکومت کی جانب سے کھیلوں کے فروغ کے ساتھ دیگر شعبہ ہائے زندگی میں بھی نوجوانوں کو بہتر مواقع فراہم کرنے کے لیے مثبت اقدامات اٹھائے جا رہے ہیں۔
ان کا مزید کہنا تھا کہ وزیر اعظم پاکستان نوجوانوں کی فلاح و بہبود کے منصوبوں میں خصوصی دلچسپی رکھتےہیں اورحکومت نوجوانوں کے لیے متعدد منصوبے چلا رہی ہے جن میں پرائم منسٹرز یوتھ بزنس لون پروگرام، پرائم منسٹرز اسکلز ڈویلپمنٹ پروگرام ، گرین یوتھ موومنٹ ، یوتھ ڈویلپمنٹ سنٹر اور دیگر پروگرام شامل ہیں۔
مذید پڑھیں : ام رباب اہلخانہ قتل کیس میں 2 اراکین اسمبلی پر فرد جرم عائد
ڈائریکٹر اسپورٹس، ہائیر ایجوکیشن کمیشن جاوید علی میمن نے کہا کہ چیئرمین ہائیر ایجوکیشن کمیشن، پروفیسر ڈاکٹر مختار احمد نوجوان کھلاڑیوں کی ہمیشہ حوصلہ افزائی کی ہےاور ان کا ماننا ہے کہ ہمارے ملک میں ٹیلنٹ کی کوئی کمی نہیں ہے، ضرورت اس امرکی ہے کہ نوجوانوں کو مواقع فراہم کیے جائیں ۔ سندھ میں منعقدہ ٹرائلزمیں ہاکی کے متعدد سینئر کھلاڑیوں نے شرکت کی اور نوجوان کھلاڑیوں کی حوصلہ افزائی کی ۔
ٹرائلز کے شرکاء کا کہنا تھا کہ یہ اپنی طرز کا پہلا پراجیکٹ ہے کہ ٹرائلز میں منتخب ہونے والے اور پراونشل لیگ میں اچھا کھیل پیش کرنے والے کھلاڑیوں کو قابل کوچز کی زیر نگرانی ابنے کھیل میں بہتری لانے کا موقع ملے گا اور یہی کھلاڑی مسقبل میں ملکی اور بین الاقوامی سطح پر پاکستان کا نام روشن کریں گے ۔
