کراچی : نارتھ کراچی ایسوسی ایشن آف ٹریڈ اینڈ انڈسٹری (نکاٹی) کے صدر فیصل معیز خان، سینئر نائب صدر شبیر اسماعییل، نائب صدر نعیم حیدر اور ایگزیکٹیو کمیٹی اراکین نے چیئرمین بزنس مین گروپ زبیرموتی والا کی بطور چیف ایگزیکٹیو آفیسر ٹریڈ ڈیولپمنٹ اتھارٹی نامزدگی کا شاندار الفاظ میں خیر مقدم کیا ہے ۔
وفاقی کابینہ کے فیصلے کو درست قرار دیتے ہوئے کہا ہے کہ زبیر موتی والا کی TDAP میں ذمہ داریاں سنبھالنے سے نہ صرف ملکی برآمدات پر اس کے اچھے اثرات مرتب ہوں گے بلکہ بزنس کمیونٹی کا کھویا ہوا اعتماد بھی بحال ہو گا۔
نکاٹی کے صدر اور دیگر عہدیداروں نے ایک بیان میں کہا کہ بزنس کمیونٹی کو جب بھی مسائل کا سامنا رہا تو زبیر موتی والا نے ان کے مسائل کو حل کرنے میں اپنا بھرپور کردار ادا کیا اور وفاقی سطح پر ایک مضبوط آواز بلند کی۔ چیئرمین بی ایم جی کی خدمات پوری تاجر برادری کے لیے قابل تحسین ہیں۔
مذید پڑھیں : ممکن ہی نہیں 358 افراد کی برطرفی بحالی میں بدل سکے : تجمل حسین
انہوں نے امید ظاہر کی کہ زبیر موتی والا تجارت و صنعت میں اپنی مہارت سے یقینی طور پر ملکی برآمدات کو فروغ دینے اور بزنس کمیونٹی کو درپیش مسائل کو حل کرنے میں اپنا ہر ممکن کردار ادا کریں گے اور اس مقصد کے تحت بزنس کمیونٹی ان کے ساتھ کھڑی ہے۔
