کراچی : جناح سندھ میڈیکل یونیورسٹی کے سندھ انسٹیٹیوٹ آف اورل ہیلتھ سائنسز کے ڈپارٹمنٹ آپریٹو ڈینٹسٹری کی جانب سے ڈیجیٹل ڈینٹسٹری کے عنوان سے سیمینار اور ورکشاپ کا انعقاد کیا گیا جس میں پوسٹ گریجویٹ طلبا اور گریجویٹ طلبا کو ڈینٹسٹری کے شعبے کی جدید تکنیک پر مبنی مفید معلومات فراہم کی گئیں اور عملی مشق بھی کروائی گئی ۔
اس سلسلے میں جناح سندھ میڈیکل یونیورسٹی کے وائس چانسلر پروفیسر امجد سراج میمن نے دور حاضر کے تقاضوں پر مبنی سیمینار اور ورکشاپ کے انعقاد کو سراہتے ہوئے اس امید کا اظہار کیا کہ طلبا یہاں سے حاصل معلومات کو عملی زندگی میں بروئے کار لاکر انسانیت کی خدمت کے پیشے میں بھرپور اور منفرد کردار ادا کرینگے۔
سیمینار سے افتتاحی خطاب میں ایس آئی او ایچ ایس کے ڈین پروفیسر ڈاکٹر سید یاور علی عابدی نےکہا کہ دنیا تیزی سے جدت اور ترقی کی جانب گامزن ہے، دیگر شعبوں کی طرح ڈینٹسٹری میں بھی آئے روز جدت آرہی ہے اور ڈیجیٹل ڈینٹسٹری اسی جدت کی ایک شکل ہے، بحیثیت ترقی پزیر ملک ہمیں زمانے کے ساتھ چلنے کیلئے ڈیجیٹل ڈینٹسٹری کو اپنانے کی ضرورت ہے ، آج کا یہ سیمینار اور ورکشاپ اس سلسلے میں پہلا قدم ثابت ہوگا۔
مذید پڑھیں :انتقامی کارروائی کرتے ہوئے JSMU انتظامیہ نے پروفیسر ڈاکٹر لبنی بیگ کو نوکری سے فارغ کر دیا
سیمینار کے مہمان خصوصی سی آئی ایم ایس میڈیکل کالج ملتان کے پرنسپل ڈاکٹر دل رشید نے کون بیم کمپیوٹڈ ٹوموگرافی (CBCT) کی اہمیت پر روشنی ڈالتے ہوئے بتایا کہ یہ اسکین ڈینٹل امپلانٹ کیس کی منصوبہ بندی میں انتہائی معاون ثابت ہوتا ہے اور اس اسکین کی مدد سے کم ترین وقت میں انتہائی بہترین امپلانٹیشن کیا جاسکتا ہے، سی بی سی ٹی اسکین دانتوں کے ڈاکٹر کو پورے منہ، جبڑے، ناک اور گلے کے حصوں کا واضح معائنہ کرنے کی سہولت فراہم کرتا ہے، سی بی سی ٹی اسکین تھری ڈی تصاویر پیش کرتا ہے جو متعلقہ حصے میں ہڈیوں، ایئر وے اور نرم بافتوں کے ساتھ ساتھ دانتوں پر ہونیوالے کام کو بھی واضح طور پر دکھاتا ہے۔
سیمینار کے اختتام پر ایس آئی او ایچ ایس کے پرنسپل پروفیسر زبیر احمد عباسی نےکہا کہ جدت ہر دور میں دیکھی جاتی ہے تاہم اصل بات یہ ہے کہ ہمیں ڈینٹسٹری کے شعبے سے جڑی جدید ٹیکنالوجی سے روشناس ہو کر اپنی زندگی کو اس کے مطابق ڈھالتے رہنا چاہیے۔
سیمینار کے اختتام پر ڈاکٹر دل رشید اور سافٹ ویئر ایکسپرٹ ذوالفقار احمد کو شیلڈز پیش کی گئیں۔ سیمینار کی نظامت ڈاکٹر ماہم منیب نے کی اس موقع پر فیکلٹی کیساتھ ساتھ طلبا و طالبات بھی بڑی تعداد میں موجود تھے۔ بعد ازاں سافٹ ویئر ایکسپرٹ ذوالفقار احمد نے ورکشاپ میں طلبا و طالبات سے جدید ٹیکنالوجی کو بروئے کار لاتے ہوئےمشق کروائی جس میں شرکاء کی جانب سے بڑھ چڑھ کر حصہ لیا گیا۔
