پشاور : خیبر پختونخوا کے ضلع سوات کی تحصیل چار باغ میں ایک سکول وین پر حملے اور ڈرائیور کی ہلاکت کے معاملے پر صوبے کے پولیس سربراہ کا کہنا ہے کہ سوزوکی وین پر حملہ دہشت گردی نہیں بلکہ ’غیرت کے نام پر قتل‘ کا واقعہ تھا۔
جمعرات کو سوات میں پریس کانفرنس کرتے ہوئے خیبر پختونخوا کے انسپکٹر جنرل آف پولیس معظم جاہ انصاری نے بتایا کہ ’ابتدا میں پولیس کے پاس ثبوت نہیں تھے کہ یہ دہشت گردی کا واقعہ نہیں ہے اور اسی وجہ سے ڈرائیور کے لواحقین کے لیے شہدا پیکج کا اعلان بھی کیا گیا تھا۔‘
تاہم معظم جاہ کے مطابق ’اس واقعے کا مقدمہ دہشت گردی کی عدالت میں چلے گا کیونکہ اس واقعے سے عوام میں عدم تحفظ کی فضا پیدا ہوگئی تھی اور ہزاروں کی تعداد میں لوگ اس واقعے کے خلاف اٹھ کھڑے ہوئے تھے۔‘ معظم جاہ نے بتایا: ’سوات کے حالات آئندہ دو تین مہینوں میں مزید بہتر ہوجائیں گے اور تمام سیاحوں کو ہماری طرف سے یہی پیغام ہے کہ سوات میں امن ہے اور وہ بلا کسی خوف کے سوات کا رخ کر سکتے ہیں۔
مزید پڑھیں : جامعہ کراچی کے ڈائریکٹر فنانس کو نئی بھرتی تک کام جاری رکھنے کا حکم
پولیس نے واقعے کے بعد بھی بتایا تھا کہ حملے میں ٹارگٹ سکول کے بچے نہیں بلکہ وین ڈرایئور تھا لیکن عوام کی جانب سے اس پر شدید ردعمل سامنے آیا تھا اور واقعے کی شفاف تحقیقات کا مطالبہ کیا گیا تھا۔ سوات میں سکول وین پر حملے کے نتیجے میں ہلاک ہونے والے ڈرائیور حسین احمد کے اہل خانہ اور علاقہ مکینوں کی جانب سے ان کے آبائی علاقے میں دھرنا دیا گیا تھا جو دو دن بعد ختم کیا گیا (سوات اولسی پاسون)
آئی جی خیبرپختونخوا نے پریس کانفرنس کے دوران بتایا کہ واقعے میں ملوث ملزمان اور مقتول رشتہ دار ہیں اور ان کا آپس میں سالے بہنوئی کا تعلق ہے۔ انہوں نے بتایا کہ ملزمان قتل کے بعد مقتول ڈرائیور کے جنازے میں بھی شریک ہوئے اور انہوں نے مظاہروں میں بھی شرکت کی تاکہ یہ تاثر دے سکیں کہ وہ بھی سوگواران میں شامل ہیں۔
معظم جاہ نے بتایا: ’واقعے میں ملوث ایک ملزم کو گرفتار کیا گیا ہے جبکہ ایک ملزم واردات کے بعد دبئی فرار ہوگیا لیکن اسے سفارتی ذرائع سے گرفتار کرکے سوات لائیں گے جبکہ تیسرے ملزم کی گرفتاری کے لیے کوششیں جاری ہیں۔‘
