روہت شرما پر بہت زیادہ دباؤ ہے، جس کے باعث وہ بیٹنگ میں پرفارم نہیں کر پارہے، محمد حفیظ

قومی کرکٹ ٹیم کے سابق کپتان محمد حفیظ کا کہنا ہے کہ ایشیاکپ میں روہت شرما کی باڈی لینگویج بہت خراب ہے وہ خوفزدہ سے دیکھائی دے رہے ہیں۔

سماجی رابطے کی سائٹ ٹوئٹر پر سابق کپتان نے ایک ویڈیو پوسٹ کی جس میں انکا کہنا تھا کہ ہانگ کانگ کے خلاف میچ میں جب روہت شرما ٹاس کیلئے آئے تو انکی باڈی لینگویج بہت خراب تھی وہ خوفزدہ اور کنفیوز نظر آئے۔

انہوں نے کہا کہ بھارتی ٹیم کی کپتانی روہت شرما پر بہت زیادہ دباؤ ڈال رہی ہے، جس کے باعث وہ بیٹنگ میں پرفارم نہیں کر پارہے۔

محمد حفیظ نے کہا کہ سمجھتا ہوں کہ ٹیم کی قیادت کا کتنا دباؤ ہوتا ہے، روہت کو کئی مواقعوں پر دیکھا ہے وہ بیٹنگ سے لطف اندوز ہوتا ہے لیکن کپتانی کے بعد سے انکی پرفارمنس پر اثر پڑا ہے۔

ایشیاکپ میں بھارتی ٹیم نے روایتی حریف پاکستان کو 5 وکٹوں سے شکست دیکر اپنی کیمپین کا آغاز کیا تھا جبکہ ہانگ کانگ کو 40 رنز کے مارجن سے ہرا کر سپر فور مرحلے تک رسائی حاصل کرلی ہے۔