نور عالم خان کا وزیرخزانہ کو ملک چلانے کے بجائے ٹافیاں بیچنے کا مشورہ

مفتاح اسماعیل

اسلام آباد: پی ٹی آئی کے منحرف رکن نور عالم خان نے وزیر خزانہ کو ملک چلانے کے بجائے ٹافیاں بیچنے کا مشورہ دے دیا۔

پاکستان تحریک انصاف سے رخ موڑنے والے رکن قومی اسمبلی نور عالم خان نے ہوشربا مہنگائی پر وفاقی وزیر خزانہ مفتاح اسماعیل کو تنقید کا نشانہ بناتے ہوئے ٹافیاں فروخت کرنے کا مشورہ دے ڈالا۔

نور عالم خان نے قومی اسمبلی میں اظہار خیال کرتے ہوئے اسپیکر راجہ پرویز اشرف سے مطالبہ کیا کہ وزیر خزانہ کو اسمبلی تو بلائیں۔

انہوں نے اپنے خطاب میں کہا کہ پیٹرول بیشک مہنگا کریں وہ امیر لوگ استعمال کرتے ہیں لیکن دنیا میں ڈیزل سستا ہورہا ہے اور یہاں ڈیزل کی قیمت میں 8 روپے کا اضافہ کردیا گیا۔

پی ٹی آئی کے منحرف رکن نے کہا کہ وزیر خزانہ صنعت کار ہیں، انہیں صنعتوں کی فکر ہے کاشتکار کی نہیں، جہاں ڈیم بنے ہوئے ہیں وہاں کے بجلی صارفین سے فیول چارجز لینا زیادتی ہے۔

نور عالم خان کا کہنا تھا کہ وزیر خزانہ اس ایوان میں آتے ہی نہیں، وہ ٹافی بیچیں کیوں کہ ان سے ملک نہیں چل رہا۔

Comments: 0

Your email address will not be published. Required fields are marked with *