شان مسعود نے ایک بار پھر پی سی اے پلیئر آف دی منتھ کا ایوارڈ جیت لیا

شان مسعود نے انگلش کاؤنٹی چیمپئن شپ میں ایک اور اعزاز اپنے نام کرلیا

پروفیشنل کرکٹرز ایسوسی ایشن (پی سی اے) نے ایک بار پھر شان مسعود کو انگلش کاؤنٹی چیمپئن شپ 2022 میں دلکش فارم کے باعث پی سی اے پلیئر آف دی منتھ منتخب کیا ہے۔

شان مسعود نے اس سے قبل اپریل کے مہینے میں یہ اعزاز جیتا تھا اور یہ دوسرا موقع ہوگا جب بائیں ہاتھ کے بلے باز کو ٹرافی سے نوازا جائے گا۔

شان مسعود اس وقت جاری کاؤنٹی چیمپئن شپ میں ڈربی شائر کی نمائندگی کررہے ہیں جس کی جانب سے کھیلتے ہوئے وہ رواں سیزن میں 1 ہزار رنز کا ہندسہ عبور کرنے والے پہلے بلے باز بن گئے ہیں۔
اسی کے ساتھ ہی شان مسعود تین ایم وی پی ایوارڈ بھی اپنے نام کرچکے ہیں۔

ایک مرتبہ پھر پلیئر آف دی منتھ کا اعزاز حاصل کرکے خوشی کا اظہار کرتے ہوئے شان مسعود نے کہا کہ مستقل مزاجی ایک کرکٹر کے طور پر ہونے والی سب سے اہم خصوصیات میں سے ایک ہے۔

انہوں نے کہا کہ کھیل کی سب سے اہم ضرورت مستقل مزاجی ہے، لوگ آپ کو پکڑنے کی کوشش کرتے ہیں لیکن آپ مخالفت کا مقابلہ کرتے ہیں۔

ان کا کہنا تھا کہ سونے کا بالکل وقت نہیں ہوتا، جس کی وجہ سے آپ ترقی کرتے رہتے ہیں، میری ابتدائی سیزن کی پرفارمنس کو دیکھیں اور اب کی پرفارمنس پر نظر ڈالیں تو اس میں مستقبل مزاجی نظر آئے گی۔

شان مسعود جاری کاؤنٹی چیمپئن شپ میں شاندار پرفارمنس برقرار رکھتے ہوئے 82.74 کی اوسط سے 1074 رنز بناچکے ہیں جس میں ان کی تین سنچریاں اور چار نصف سنچریاں شامل ہیں۔

یہاں یہ بات قابل ذکر ہے کہ شان مسعود کو سری لنکا کے خلاف ٹیسٹ سیریز کے لیے قومی ٹیسٹ اسکواڈ کا حصہ بنایا گیا ہے تاہم اب دیکھنا ہوگا کہ پاکستان کے لیے کون اوپننگ کرے گا کیونکہ عبداللہ شفیق اور امام الحق بھی فارم میں موجود ہیں۔

Comments: 0

Your email address will not be published. Required fields are marked with *