اسلام آباد یونائیٹڈ نے پشاور زلمی کو شکست دیکر پی ایس ایل 7 سے باہر کردیا

پی ایس ایل 7 کے پہلے ایلیمینٹر میں اسلام آباد یونائیٹڈ نے پشاور زلمی کو 5 وکٹ سے شکست دے کر ایونٹ سے باہر کردیا۔

پاکستان سپر لیگ کے ساتویں ایڈیشن کا پہلا ایلیمنیٹر لاہور کے قذافی اسٹیدیم میں کھیلا گیا جہاں پشاور زلمی نے پہلے بیٹنگ کرتے ہوئے کامران اکمل کی نصف سنچری کی بدولت مقررہ 20 اوورز میں 5 وکٹ کے نقصان پر 169 رنز بنائے۔

ہدف کے تعاقب میں الیکس ہیلز کی زبردست بیٹنگ کی بدولت اسلام آباد یونائیٹڈ نے مطلوبہ ہدف 3 گیندیں پہلے ہی 5 وکٹ کے نقصان پر حاصل کرلیا۔

اسلام آباد کی جانب سے ول جیس اور الیکس ہیلز نے اننگز کا آغاز کیا، ول جیکس 1 رنز کے مہمان ثابت ہوئے تاہم الیکس ہیلز نے ذمہ داری کا مظاہرہ کرتے ہوئے نصف سنچری اسکور کرکے ٹیم کی جیت میں اہم کردار ادا کیا۔

الیکس ہیلز 49 گیندں پر 62 رنز کی اننگز کھیل کر آؤٹ ہوئے جس میں 3 چھکے اور 6 چوکے شامل تھے۔ کپتان شاداب خان نے بھی بھرپور انداز میں واپسی کرتے ہوئے 22 رنز کی اننگز کھیلی۔

آخری اوور میں اسلام آباد یونائیٹڈ کو جیت کے لیے 10 رنز درکار تھے، پہلی گیند پر بنی ہوویل نے اعظم خان کو پویلن واپس بھیج دیا تاہم لیام ڈاسن نے اگلی گیند پر چھکا اور تیسرے گیند پر چوکا لگاکر میچ ختم کردیا۔

اس سے قبل پشاور زلمی کے کپتان وہاب ریاض نے اسلام آباد یونائیٹڈ کے خلاف ٹاس جیت کر پہلے بیٹنگ کرنے کا فیصلہ کیا تو کامران اکمل اور محمد حارث نے اننگز کا آغاز کیا۔ محمد حارث 12 رنز بنانے کے بعد فہیم اشرف کا شکار بن گئے۔

کامران اکمل نے 39 گیندوں پر 58 رنز کی اننگز کھیلی جس میں 2 چھکے اور 7 چوکے شامل تھے جب کہ شعیب ملک نے 43 گیندوں پر 55 رنز بنائے جس میں 2 چھکے اور 4 چوکے شامل تھے۔

Comments: 0

Your email address will not be published. Required fields are marked with *