جماعت اسلامی کراچی کے عوام کی امیدوں کا مرکز و محور بن گئی ہے، حافظ نعیم الرحمن

کراچی : امیر جماعت اسلامی کراچی حافظ نعیم الرحمن نے کہا کہ جماعت اسلامی کراچی کے عوام کی امیدوں کا محورومرکز بن گئی ہے۔صرف جماعت اسلامی ہی واحد جماعت ہے جو تین کروڑ سے زائد عوام کے جائز اور قانونی حقوق کے حصول اور شہر کے دیرینہ مسائل کے حل کے لیے موثر آواز اُٹھا رہی ہے اور جدو جہد کر رہی ہے۔کنٹونمنٹ بورڈ کے انتخابات میں عوام کی جانب سے بھرپور پذیرائی سے حوصلہ مل رہا ہے۔کنٹونمنٹ بورڈ کے انتخابات میں کامیابی حاصل کریں گے۔عوام کو دوست دشمن کی تمیز ہوچکی ہے۔کارکنان رابطہ عوام مہم کوتیز کریں۔کنٹونمنٹ بورڈ کے بعد بلدیاتی انتخابات کے لیے بھی تیاریاں شروع کردیں۔ان خیالات کا اظہار انہوں نے ضلع کورنگی کے ہرسطح کے ناظمین کے اجتماع سے اپنے خصوصی خطاب میں کیا۔

اجتماع سے امیر ضلع کورنگی عبدالجمیل خان،نائب امیر سید اقبال سعید،سیکریٹری عبدالحفیظ،پبلک ایڈ کمیٹی کے صدرمحمد شفیق نے بھی خطاب کیا،جبکہ ناظمین شعبہ جات اور ناظمین علاقہ جات نے اپنی اپنی ششماہی رپورٹس پیش کی۔

حافظ نعیم الرحمن نے کہا کہ جماعت اسلامی ایک نظریاتی جماعت اور اقامت ِ دین کی جدو جہد کی تحریک ہے، جماعت اسلامی نے کراچی کے عوام کی ہمیشہ بلاتفریق رنگ ونسل خدمت کی ہے اورہم کراچی کے عوام کے بنیادی مسائل کے حل اور آئینی و قانونی حقوق کے حصول کی جدو جہد میں مصروف ہیں۔پیپلز پارٹی اور ایم کیو ایم دونوں نے مل کر شہر کو لوٹا اور اسے تباہ و برباد کیا ہے۔پی ٹی آئی نے بھی کراچی کے لیے عملاً کچھ نہیں کیا صرف زبانی جمع خرچ اور دعوؤں اور وعدوں سے اہل کراچی کو دھوکہ دیا جا رہا ہے۔

انہوں نے کہا کہ ناظمین جماعت اسلامی کی جدو جہد کا ستون ہیں اور ہمارا پورا اسٹریکچرناظمین کے ہی مرہون منت ہے ایک موثر اور فعال ناظم ہی بہتر نتائج دے سکتا ہے۔جماعت اسلامی ضلع کورنگی کے تمام شعبہ جات نے بہترین کارکردگی کا مظاہرہ کیا ہے۔ہمیں اپنی جدوجہد کو اور زیادہ تیز کرنا ہے اور عوام کو ایک بڑی تبدیلی کے لیے تیار کرنا ہے۔جماعت اسلامی عوام کے ووٹوں کی طاقت کے ذریعہ ملک اور شہر میں حقیقی اور پائیدار تبدیلی لائے گی۔

امیر ضلع عبدالجمیل خان نے کہا کہ ہر تین اور چھ ماہ بعد ہم اپنی کارکردگی کا جائزہ لیتے ہیں اور اپنی کمزوریوں کو دور کرنے کی کوشش کرتے ہیں تاکہ بہتر نتائج برآمد ہوسکیں اور دعوت ِ دین و عوامی خدمت کی جدو جہد کو تیز کر سکیں۔انہوں نے کہا کہ کنٹونمنٹ بورڈ کے انتخابات کے سلسلے میں مختلف علاقوں میں انتخابی سرگرمیاں تیزی کے ساتھ جاری ہیں، ہماری کوشش ہے کہ عوام سے زیادہ سے زیادہ رابطہ کرین اور ان کے بنیادی مسائل ترجیحی بنیادوں پر حل کرانے کی کوششیں کریں۔

Comments: 0

Your email address will not be published. Required fields are marked with *