بلوچستان کے 9 ہزار سرکاری اسکول پینے کے صاف پانی، ٹوائلٹ سے محروم

رپورٹ : ناصر الدین بلوچ

محکمہ تعلیم بلوچستان کی دستاویزات میں انکشاف ہوا ہے کہ حکومت کی سرپرستی میں چلنے والے 9 ہزار 247 اسکولوں میں بچوں کے لیے پینے کا صاف پانی میسر نہیں، جبکہ 9 ہزار 838 اسکولوں میں ٹوائلٹ جیسی بنیادی سہولیات کا بھی فقدان ہے۔

دستاویزات میں کہا گیا کہ ’صوبے میں مجموعی طور پر 13 ہزار سرکاری اسکولز ہیں جہاں پر 8 لاکھ 99 ہزار 383 طلبہ کا اندراج ہیں. ’صوبے میں 7 ہزار 900 سے زائد اسکول چار دیواری سے محروم ہیں اور 5 ہزار 296 سرکاری درسگاہوں میں ’ایک کمرہ، ایک استاد‘ ہیں۔

صوبائی محکمہ برائے پلاننگ کے افسر کے مطابق’اسکولوں میں درکار بنیادی سہولیات کی فراہمی کے لیے مالی سال 17-2016 اور 18-2017 میں منظور ہونے والا بجٹ 2 ارب روپے استعمال نہ ہونے کے باعث پیسے وفاق کو واپس ہو گئے تھے۔

مذکورہ رپورٹ منظر عام پر آنے کے بعد وزیر اعلیٰ بلوچستان جام کمال خان نے نوٹس لیتے ہوئے تمام اضلاع کے ڈپٹی کمشنرز کو اپنے علاقوں میں موجود سرکاری اسکولوں کا دورہ کرنے کی ہدایت کردی۔ سرکاری اعلامیے کے مطابق وزیراعلیٰ نے ڈپٹی کمشنرز کو ہدایت کی کہ اپنے دورے سے متعلق مکمل تفصیلات پر مشتمل رپورٹ جمع کرائیں۔

واضح رہے کہ بلوچستان میں تعلیمی ایمرجنسی نافذ ہے اور بچوں کو لازمی طور پر اسکول میں اندراج کرانے کے لیے آئین کے آرٹیکل 25 ‘اے’ کا نفاذ ہے۔مذکورہ آرٹیکل کے مطابق ’ریاست قانون کی رو سے 5 سے 16 سال کی عمر کے تمام بچوں کو مفت اور لازمی تعلیم دینے کی پابند ہوگی‘۔

مذکورہ آرٹیکل کو آئین میں 18ویں ترمیم کے ذریعے شامل کیا گیا تھا۔تاہم تعلیمی ایمرجنسی کے نفاذ کے باوجود صوبے میں 10 لاکھ بچے تاحال اسکول جانے سے محروم ہیں۔

Comments: 0

Your email address will not be published. Required fields are marked with *