واقعہ کربلا ہمیں اعلیٰ مقاصد کی خاطر ایثار و قربانی کا درس دیتا ہے، وزیراعظم

اسلام آباد: وزیر اعظم عمران خان نے کہا کہ آج ہمیں متحد ہونے اور ایثار کے جذبے کی پہلے سے کہیں زیادہ ضرورت ہے تاکہ ہم دشمنان ملک و ملت کے ناپاک عزائم کو شکست دے سکیں اور اسی میں ہماری بقا ہے۔

یوم عاشور کے موقع پر قوم کے نام جاری پیغام میں وزیر اعظم نے کہا کہ آج کا دن ہمیں اس عظیم قربانی کی یاد دلاتا ہے جو نواسہ رسولؐ حضرت امام حسینؓ اور ان کے ساتھیوں نے دین کی حفاظت و حرمت کے لیے معرکہ کربلا میں پیش کی، واقعہ کربلا ہمیں اعلیٰ مقاصد کے حصول کی خاطر ایثار و قربانی کا درس دیتا ہے، استقامت حق کا حصول ہی وہ مشن ہے جس کے لیے کسی بھی قسم کی قربانی سے دریغ نہیں کرنا چاہیے۔

عمران خان نے کہا کہ آج کا دِن ہمیں نواسہ رسولؐ اور جگر گوشہ بتولؓ کے عظیم افکار و اعمال کی یاد دلاتا ہے، حق و باطل کی لڑائی اس دور میں بھی جاری ہے حضرت امام حسین ؓ نے اپنی لازوال قربانی سے یہ ثابت کیا کہ باطل جب بھی حق سے ٹکرایا ہے نیست و نابود ہوا ہے ثابت قدمی اور استقامت کی یہی مثال ہمارے لیے مشعل راہ ہے۔
وزیر اعظم نے مزید کہا کہ وطن عزیز کے حالات کو دیکھتے ہوئے آج ہمیں متحد و منظم ہونے اور ایثار و قربانی کے جذبے کو فروغ دینے کی پہلے سے کہیں زیادہ ضرورت ہے تاکہ جہاں ہم دشمنان ملک و ملت کے ناپاک عزائم کو شکست دے سکیں وہاں ملک و قوم کی بہتری کے لیے عملی اقدامات اٹھانے میں ثابت قدم رہ سکیں، یہی وقت کی ضرورت ہے اور اسی میں ہم سب کی بقا ہے۔

Comments: 0

Your email address will not be published. Required fields are marked with *